Chi xe che gà inventà
"Polenta e bacalà"?

Disìmelo, creature,
‘sto nome, ‘sto portento,
che toga le misure
par farghe un monumento.

Dante, Petrarca e Tasso
xe piavoli al confronto,
Omero xe un pajasso
e Metastasio un tonto.

No ghe xe al mondo un piato
che possa starghe a peto,
sia lesso o mantecato,
col pien o col torceto.

Fato a la visentina,
fato a la capuçina,
de sera o de matina:
che roba soprafina!

L’imbalsama, el sublima,
el sazia, l’incocona
e dentro el te combina
‘na festa cussì bona

che dopo gnanca un’ora
che te lo ghe magnà
vien su…la dolce aurora
de la feliçità.

 

Agno Berlese